Napakatagal na, ngunit nang ako ay nasa kolehiyo, marami akong kinuhang kursong matematika. Nalimutan ko na ang 90 porsiyento ng tinuro sa akin, ngunit bahagya kong naaalala ang isang bagay. Maaari kang magdagdag sa isang bahagi ng equation sa matematika basta magdaragdag ka rin ng kaparehong numero sa kabilang bahagi. Kailangan mong magdagdag ng parehong halaga sa bawat bahagi.
Halimbawa, sinusubukan nating alamin kung ano ang X (marahil bubuhayin nito ang napakaraming bangungot para sa karamihang nagbabasa nito). Ang equation ay maaaring:
X – 3 = 3Y + 5
Upang malaman kung ano ang X, maaari tayong magdagdag ng 3 sa parehong bahagi ng equation. Magmumukha itong:
X – 3 (+ 3) = 3Y + 5 (+ 3)
Iiwan tayo nito ng sagot na:
X = 3Y + 8
Kamakailan, napansin kong si Pedro ay gumamit ng kaparehong equation sa 2 Ped 1:5-11. Ginamit niya pa nga ang terminong matematikal na dagdag. Sa isang bahagi ng equation ay ang ating pananampalataya. Sa kabilang bahagi ng equation ay ang ating pagpasok sa kaharian ng Diyos. Maaari nating isulat ang equation bilang
Pananampalataya = Pagpasok sa kaharian
Sinasabi ng equation na itong ang sinumang nanampalataya kay Jesus para sa buhay na walang hanggan (pananampalataya) ay mamumuhay kasama ni Cristo magpakailan man (pagpasok sa kaharian). Sa Kaniyang pagbalik, ang mananampalataya ay papasok sa Kaniyang kaharian magpakailan man.
Ngunti sinabi ni Pedrong maaaring magdagdag ang mananampalataya sa kaniyang pananampalataya (v5). Iniisip kong marahil ang nasa isip ni Pedro ang mga dati niyang klase sa matematika. Sinasabi niyang bilang mananampalataya tayo ay maaaring magdagdag sa kaliwang bahagi ng equation. Nilista ni Pedro ang maaari nating idagdag: kagalingan, kaalaman, pagpipigil, pagtitiis, kabanalan, mabuting kalooban sa kapatid, at pag-ibig.
Sinabi ng apostol na kung idaragdag natin ang mga bagay na ito sa ating pananampalataya (ang kaliwang bahagi ng equation), ang Panginoon ay magdaragdag din sa kanang bahagi. Sinalin ng NKJV ang sinabi ni Pedro na ang ating pagpasok sa kaharian ay “will be supplied” (“ipamamahagi”) (v11). Ang salitang ipamamahagi ay kapareho ng ginamit sa v11. Malinaw na matematika ang nasa isip ni Pedro!
Sinasabi ni Pedrong kapag tayo ay nagdagdag sa ating pananampalataya, ang Panginoon ay magdaragdag sa ating pagpasok sa kaharian. Ngunit dito bumagsak ang matematika. Hindi ko alam kung gaano kahusay si Pedro sa alhebra, ngunit hindi niya sinunod ang mga alituntunin nito. Kapag nagdagdag ka ng mga bagay, dapat sila ay magkapareho. Sa 2 Ped 1:5-11, ang mga bagay na dinagdag ay hindi magkapareho.
Gusto ni Pedrong magdagdag tayo ng ilang malalaking bagay sa ating pananampalataya (kagalingan, kaalaman, pagpipigil atbp). Hindi madaling gawin ang mga bagay na ito.
Inaasahan nating ang Panginoon ay magdaragdag ng katumbas na malalaking bagay sa Kaniyang bahagi ng equation. Kung idaragdag natin ang mga bagay na ito sa ating pananampalataya, ano naman ang idaragdag ng Panginoon sa ating pagpasok sa kaharian? Ang nasumpungan natin ay hindi magkaparehong halaga.
Mas marami ang Kaniyang dinagdag. Napakarami.
Ang paraan ng pagkasabi ni Pedro ay ipinamamahaging sagana ang ating pagpasok sa kaharian. Ang salita ay nangangahulugang “mayaman.” Anumang idagdag natin sa ating pananampalataya, ang Kaniyang idaragdag ay mas malaki at nakahihigit dito.
Bumagsak ang matematika ni Pedro. Sinasabi niyang anumang gawin natin para sa Panginoon ay gagantimpalaan sa mundong darating. Marahil iniisip nating ang ating ginagawa ay malaki at mahirap. Ngunit kapag ginantimpalaan Niya tayo sa mga bagay na ating ginawa para sa Kaniya, hindi sila magkatumbas. Ang kanang bahagi ng equation ay mas malaki. Ang Kaniyang gantimpala sa mga bagay na ginawa sa Kaniyang pangalan ay higit pa sa anumang gawin natin.
Ito ay pangit na matematika pero mabuting balita para sa tapat na mananampalataya.
